Эх орны ирээдүй болсон хүүхэд багачууд, үе үеийн багш сурган хүмүүжүүлэгчид, ажилтан, ажилчид, төгсөгчид, эцэг эхчүүдийнхээ амрыг эрэн мэндчилье.

Өвөг дээдэс маань эрт үеэс хойч үедээ эд баялгийг эрхэмлэх бус эрдэм мэдлэгийг чухалчилсан “Хүн шиг хүн” болгохыг чармайн, алив сайн сайхан зүйлийг зааж, сургаж ирсэн уламжлалтай. “Хүн шиг хүн” байхын чандмань гурван эрдэнэ бол хүмүүжил, эрдэм мэдлэг, эх оронч үзэл билээ. Тийм учраас  Монгол Улсын Засгийн газраас Үндэсний түүх, хэл соёл, зан заншил, өв уламжлалаа дээдэлдэг, дэлхийд өрсөлдөх  “Монгол хүн” -ийг бэлтгэхэд манай боловсролын бодлого, үйл ажиллагаа чиглэж байна.

1997 онд  Нийслэлийн засаг даргын захирамжаар БГД-ийн 77, 54, 78-р сургуулиудын хамт олон “Эрдмийн Ундраа Цогцолбор Сургууль“ нэрийн дор нэгдэж, нэг санаа зорилготойгоор өнөөг хүртэл ажиллаж ирсний дүнд Нийслэл, дүүргийн хошой тэргүүний сургууль, Нийслэлийн индексийн тэргүүний сургууль хэмээх нэр алдрыг өвөртөлсөн нь бидний томоохон амжилт юм. Энэ амжилтыг бүтээхэд гар бие, сэтгэл зүрхээ зориулан ажилласан ахмад үеийн удирдлагууд, багш, ажилтан, ажилчдын маань хичээл зүтгэл, шаргуу хөдөлмөр, хувь нэмрийг үнэлж баршгүй билээ.

“Багшийн эрдэм шавьд” гэдэг. Олон улс, нийслэл, дүүрэгтээ нэр алдраа мандуулсан Д.Занданшатар, Д.Сумьяабазар, Д.Дагвадорж, Д.Батбаясгалан, Н.Бундмаа, О.Одгэрэл, Б.Сэр-Од ... гээд  олон шавь нараараа  бид бүхэн бахархахын зэрэгцээ  тэднээсээ урам зориг,  эрч хүчийг аван, багш нарынхаа хөгжих боломжийг бүрдүүлж, суралцагч бүрийн сурах үйлийг дэмжин, сургалтын чанарт ахиц гаргах зорилго тавин ажиллаж байна.

Эцэг эхчүүд, сурган хүмүүжүүлэгчид та бүхэн маань үр хүүхэд, хойч үеийнхээ төлөө хүлээсэн үүрэг хариуцлагаа ухамсарлан, дэмжиж ажилладагт талархал илэрхийлье.

Монгол хүүхэд бүхэн эрүүл саруул байж, инээд баяслаар дүүрэн байх болтугай.